Кыргыз Республикасынын шайлоо жана референдум өткөрүү боюнча Борбордук комиссиясы Кыргыз Республикасынын Жогорку Кеңешинин депутаты Асанов Курсан Сатаровичтин ыйгарым укуктарын депутататтык ыйгарым укуктарды аткарууга мүмкүн болбогон кызматка өткөндүгүнө байланыштуу мөөнөтүнөн мурда токтотту. Мурда белгилүү болгондой К.Асанов КР Премьер-министринин буйрутмасы менен КР ички иштер министринин орун басары болуп дайындалган.

Боршайкомдун бүгүнкү жыйналышында ошондой эле Кыргыз Республикасынын Жогорку Кеңешинин депутаттыгына “Кыргызстан социал-демократиялык партиясынан” (СДПК) партиянын тизмесинде кезектеги Иманкожоева Эркингүл Бекбабачаевна катталды. Боршайкомдун жыйналышында Э.Иманкожоевага күбөлүк жана белгиленген үлгүдөгү төш белги тапшырылды.

Мындан тышкары Боршайкомдун жыйналышында 2011-жылдын 17-апрелинде мыйзам чегинде өткөн Ош, Баткен жана Талас областарынын 6 райондорундагы 13 жергиликтүү кеңештерге шайлоолордун жыйынтыгы тууралуу маалымат берилди. 171 мандатка 35 округдан жергиликтүү кеңештердин депутаттыгына 376 талапкер көрсөтүлгөн. Добуш берүү күнүнө чейин депутаттыкка 5 талапкер өзүлөрүнүн кандидатураларын алып салышкан. Натыйжада ар бир орунга орточо 2,16 талапкер ат салышкан.

Ош облусу боюнча 206 талапкер катталган, алардын 192си өзүн өзү көрсөткөндөр, саясый партиялардан болгону 14 талапкер көрсөтүлгөн, Талас облусу боюнча 76 талапкер көрсөтүлгөн, алардын 68и өзүн өзү көрсөткөн, саясый партиялардан-8, Баткен облусу боюнча 94 талапкер катталган, алардын 65и өзүн өзү көрсөткөндөр, 29 талапкер саясый партиялардан көрсөтүлгөн. Шайлоочулардын эң активдүүлүгү Талас облусунда-59,45% байкалган, Ош облусунда 47,08%, Баткен облусунда 39,32%.

Талас облусунда шайланган депутаттардын 4 “СДПК” партиясынан көрсөтүлгөн, Ош облусу боюнча 7 депутат “Республика” партиясынан көрсөтүлгөн, Баткен облусу боюнча 15 депутат шайланып, 11и “Ата Журт” партиясынан, 3 “Бүтүн Кыргызстан” жана 1 “Республика” партиясынан».

Жыйналышта БШК төрагасы Акылбек Сариев Жогорку Кеңештин депутаты Саматов Жыргалбек Алимбаевичтин жарандуулугу тууралу маселени айтты. БШК төрагасы белгилегендей тийиштүү ведомстволордон расмий документтерди алганга чейин маселе ачык бойдон калат.