«Кыргыз Республикасынын Президентин шайлоону дайындоо жөнүндө» Кыргыз Республикасынын Жогорку Кеңешинин 2017-жылдын 14- июнунун № 1681-VI токтому менен Кыргыз Республикасынын Президентин шайлоо  2017-жылдын 15-октябрына дайындалды.

Кыргыз Республикасынын Президентин шайлоо мезгилинде шайлоо алдындагы үгүт ишине катышууну каалаган Кыргыз Республикасынын жалпыга маалымдоо каражаттары жана интернет-басылмалары эфирдик убакыттын, басылма аянттын же интернет-басылмада жарыялоо укугун төлөөнүн өлчөмү жөнүндө маалыматтарды коштомо кат менен Кыргыз Республикасынын Шайлоо жана референдум өткөрүү боюнча борбордук комиссиясына 2017-жылдын 4-июлуна чейин берүүгө тийиш.

Аккредитациялоо үчүн жалпыга маалымдоо каражаттар жана интернет-басылмалар билдирүү менен бирге Борбордук шайлоо комиссиясына төмөнкү документтерди берүү керек:

- эфирдик убакыттын, басылма аянттын же интернет-басылмада жарыялоо укугун төлөөнүн өлчөмү жана башка шарттары жөнүндө маалыматтарды;

- жалпыга маалымдоо каражаттын Кыргыз Республикасынын Юстиция министрлигинде катталгандыгы жөнүндө күбөлүктүн көчүрмөсүн;

 - жеке жактын мамлекеттик каттосу (кайра каттоо) же жеке ишкердин мамлекеттик каттоосу (интернет-басылмалар үчүн) жөнүндө күбөлүктүн көчүрмөсүн;

- жалпыга маалымдоо каражаттын уставынын көчүрмөсүн (бар болсо) берүү керек;

Документтер Бишкек ш., Раззаков к. 59, 210 каб. тапшырылат (документтик камсыздоо бөлүмү).

Жалпыга маалымдоо каражаттар жана интернет-басылмалар билдирүүсүндө камтылган маалыматты Борбордук шайлоо комиссиясынын электрондук вариантын дагы “Кыргыз Республикасынын Президентинин шайлоого аккредитациялоо үчүн” деген белги коюу менен  төмөнкү электрондук дарекке жөнөтүүгө тийиш: pr.shailoo@gmail.com

Берилген маалыматтар жалпыга тааныштыруу үчүн Борбордук шайлоо комиссиясынын расмий сайтына 2017-жылдын 9-июлуна чейин жарыяланат.

Эскерте кетсек, эфир убактысын берүүнүн, мезгилдүү басма сөздө же интернет-басылмада жарыялоо үчүн акы төлөөнүн өлчөмү бардык талапкерлер үчүн бирдей болууга тийиш. Акы төлөнүүчү эфир  убактысынын, мезгилдүү басма сөздөгү же интернет-басылмадагы баа шайлоо дайындалган күнгө чейинки 6 ай үчүн алынган баадан ашышы мүмкүн эмес.

Билдирүүлөрүн жана керектүү документтерин 2017-жылдын 4-июлунан кийин берген жалпыга маалымдоо каражаттары жана интернет-басылмалар Кыргыз Республикасынын Шайлоо жана референдум өткөрүү боюнча борбордук комиссиясы тарабынан аккредитацияланбайт.  Билдирүүгө көрсөтүлгөн талаптарга жооп бербеген  же керектүү документтерсиз жиберилгендер каралбайт.

Жалпыга маалымдоо каражат, интернет-басылма жана  алардын өкүлдөрү Кыргыз Республикасынын мыйзамдарынын талаптарын бузган учурда Борбордук шайлоо комиссиясы  жалпыга маалымдоо каражаттын, интернет-басылманын жана алардын өкүлдөрүнүн аккредитациясын чакыртып алууга укуктуу.

Жалпыга маалымдоо каражаттардын жана интернет-басылмалардын өкүлдөрүнүн саны чектелбейт.

Борбордук шайлоо комиссиясы тарабынан аккредитацияланбаган жалпыга маалымдоо каражаттар, интернет-басылмалар шайлоону маалыматтык камсыздоого расмий маалыматтарды жана маалыматтык (жаңылыктар) билдирүүлөрдү чагылдыруу жолу аркылуу гана, шайлоо алдындагы үгүт белгилерисиз катышууга укуктуу

Чет мамлекеттердин жалпыга маалымдоо каражаттарынын кабарчыларын шайлоонун даярдоонун жана өткөрүүнүн жүрүшүн чагылдыруу үчүн аккредиттациялоо Борбордук шайлоо комиссиясы тарабынан, алардын тапшырыктары жана Кыргыз Республикасынын Өкмөтүнүн 2000-жылдын 19-апрелиндеги № 215 токтому менен бекитилген “Кыргыз Республикасынын аймагында чет мамлекеттердин жалпыга маалымдоо каражаттарынын кабарчыларын аккредиттациялоо жөнүндө” Жобого ылайык Кыргыз Республикасынын Тышкы иштер министрлиги тарабынан берилген аккредиттациялоо жөнүндө күбөлүктү көрсөткөн учурда жүргүзүлөт.

Кошумча маалыматтарды алуу үчүн телефондор:

Маалыматтык камсыздоо бөлүмү:  +(996 312) 66-54-52,  

Маалымдоо тобу:  +(996 312) 66 01 43.

Документтик камсыздоо бөлүмү: +(996 312) 62 08 23

КР БШКнын аппаратынын маалыматтык бөлүмү